Се шири мрежата на Локал Актив – Работилница за нови медиуми на заедницата во Струмица

Петнаесетина новинари, активисти и млади луѓе од Југоисточниот регион беа дел од работилницата на која се запознаа со начинот на функционирање и етичките стандарди на медиумите на заедницата.

Настанот, кој се одржа на 3 јуни во Струмица, беше организиран од Институтот РЕСИС и Советот за етика во медиумите на Македонија (СЕММ) во рамки на проектот „Медиуми на заедницата за посилно граѓанско општество“, поддржан од Владата на Швајцарија преку Цивика мобилитас. Целта на проектот е иницијативата Локал Актив, како еден редок пример на медиум на заедницата во Македонија, да се прошири во нови региони низ земјата.

Настанот го отвори Игор Мицевски од Институтот РЕСИС, кој го претстави концептот на медиумите на заедницата и детално ги објасни истражувачките и застапувачките процеси во редакциите на Локал Актив. Беше потенциран моделот на соработка помеѓу искусни новинари и активисти или млади луѓе, чија цел е заеднички да работат на истражувачки стории и паралелно да ги надградуваат вештините – од процесот на истражување, па сè до фазата на застапување.

Мицевски заедно со Снежана Трпевска и Слаѓан Пенев од РЕСИС ги водеа учесниците низ процесот на пишување за медиумите на заедницата, од идентификување на проблем и развивање новинарска тема, до структурата на текстот и аргументирањето. Втората сесија беше посветена на саморегулацијата, каде Билјана Георгиевска од СЕММ зборуваше за значењето на етичките стандарди и ги претставија успешните европски примери на медиуми кои функционираат на сличен принцип.

Работилницата заврши со практични вежби во кои учесниците самостојно истражуваа и предлагаа теми за потенцијални стории, добивајќи директни коментари и поддршка од искусните членови на тимот на РЕСИС. Дел од овие теми, од голема важност за локалните заедници, се планираат да бидат обработени низ новинарски стории во следниот период.

Досега во земјава постојат три медиуми од иницијативата Локал Актив – „Локал Актив“, „Локал Актив Вардар” и „Локал Актив Пелагонија“. Во следниот период Институтот РЕСИС, заедно со СЕММ ќе ја истражат можноста вакви платформи да се формираат во другите региони низ Македонија. Работилницата во Струмица беше прва од серијата настани кои се планираат во Југоисточниот, Полошкиот, Југозападниот и Североисточниот регион.

Содржината на оваа објава е единствена одговорност на Институтот РЕСИС и на Советот за етика во медиумите на Македонија (СЕММ) и на ниту еден начин не може да се смета дека ги одразува гледиштата на Владата на Швајцарија, Цивика мобилитас или на организациите што ја спроведуваат.