Реакција на настаните поврзани со поставувањето на споменикот на двоглав орел во Топанско Поле и камен темелник на крст во Општина Бутел

Асоцијацијата за демократски иницијативи, како дел од проектот „Патоказ кон слободни и фер избори“, испраќа реакција по повод настаните и инцидентите поврзани со поставувањето на споменикот на двоглав орел во Топанско Поле и камен темелник на крст во Општина Бутел.

Како и во изминатите предизборни циклуси, така и во овој предизборен период кој по својата природа е специфичен по сериозната политичка криза во која е навлезена државата, забележуваме разнишување на меѓуетничките односи и појава на засилена националистичка реторика и делувања на политичките субјекти. Во тој контекст ги толкуваме и последните случувања околу поставувањата на спомен обележјата на територијата на Скопје кои се значајни симболи на идентификација на двете најголеми етнички заедници во Македонија.

Апелираме до сите надлежни институции за проактивен пристап и внимателност во разрешувањата на претходно наведените инциденти согласно законски доверените надлежности и овластувања.

Апелираме до сите политички субјекти да се воздигнат над ситуацијата, да не ја заоструваат и онака специфичната политичка атмосфера, да не ги злоупотребуваат националните и верски симболи за нивни партиски цели и за дефокусирање на вниманието на јавноста од сериозните политички и општествени процеси низ кои поминува земјата, а кои ја оддалечуваат од патот на евро-атлантските интеграции.
Веруваме дека граѓаните на Македонија ги надраснаа ваквите предизвици, веруваме во нивната граѓанска, политичка и општествена свесност и рационалност и ги повикуваме да не дозволат да бидат искористени во намерните и оркестрирани конструкции на политичките партии за предизвикување меѓуетнички тензии и во овој предизборен период.

На крај, сметаме дека е крајно време на граѓаните на Македонија да почнат да им се обезбедуваат симболи на обединување, наместо злоупотребување на истите.

Асоцијацијата за демократски иницијативи мониторингот на меѓуетничките односи го спроведува во рамките на проектот „Патоказ кон слободни и фер избори“ кој е поддржан од Амбасадата на Обединетото Кралство на Велика Британија и Северна Ирска, Амбасадата на Кралството Холандија Националниот демократски институт и Националниот фонд за демократија. Проектот се реализира во партнерство со Граѓанската асоцијација „МОСТ“, Центарот за економски анализи, Првата детска амбасада во светот „Меѓаши“ и Младинскиот културен центар – Битола.

Асоцијацијата за демократски иницијативи е корисник на институционален грант од програмата Цивика мобилитас.