![[Aggregator] Downloaded image for imported item #46146](https://civicamobilitas.mk/wp-content/uploads/2026/03/648727226_951723400757159_9081274714969405281_n-724x1024-1-e1774260745627.jpg)
Ова не е честитка за 8 Март – ова е повик за одговорност
По повод 8 Март, Здружението СТАНИЦА ПЕТ ја објави онлајн кампањата со пораката „Ова не е честитка за 8ми Март“, со цел да потсети дека зад симболиката на овој ден стои реалност со која многу жени сè уште се соочуваат – насилство, институционална незаинтересираност и системски пропусти.
Флаерот не е порака на одбележување, туку на аларм. Тој е потсетник за жените кои го изгубиле животот како последица на родово базирано и семејно насилство, но и за оние кои секојдневно живеат во страв и неизвесност. За системот тоа беше процедура. За нив – последни денови! Ова ја отсликува длабоката разлика меѓу формалниот пристап на институциите и реалните, животозагрозувачки ситуации на жртвите.
Само во првите месеци од 2026 година, во Северна Македонија се регистрирани најмалку 4 случаи на фемицид. Овие бројки не се само статистика – тие се изгубени животи и пропуштени можности за навремена заштита.
Особено потресен е последниот случај во Скопје, каде 31-годишна жена и нејзиното дете ги загубија животите по долг период на семејно насилство. Според достапните информации, институциите имале сознанија за насилството, но не биле преземени соодветни и навремени мерки за заштита. Овој случај повторно го отвора прашањето: колку предупредувања се потребни за да се спречи трагедија?
Ваквите настани ја нагласуваат итната потреба од функционален, координиран и одговорен систем за заштита, кој нема да реагира само формално, туку ќе обезбеди вистинска безбедност за жртвите. Насилството не смее да се третира како административна постапка, туку како сериозен ризик по живот.
Со оваа кампања, бараме одговорност, навремена реакција и суштинска заштита. Ниту една жена не смее да остане сама пред насилството. Ниту едно дете не смее да расте во средина на страв.
Кога институциите доцнат – насилството не чека.
![[Aggregator] Downloaded image for imported item #52397](https://civicamobilitas.mk/wp-content/uploads/2026/10/reg5-1024x576-1-768x432.jpg)
