„Од едукација до акција: Поставен првиот систем за колективно компостирање во село Ропотово“

Во рамки на нашите активности за зајакнување на локалните капацитети за одржливо управување со отпадот, успешно реализиравме тридневна обука за компостирање со вработените од Јавното комунално претпријатие Долнени. Работилниците беа одржани на 03.04.2025, 15.04.2025 и 06.05.2025 година во с. Ропотово, која резултираше со воспоставување систем за собирање и преработка на органски отпад на локално ниво.

---

Ден 1: Големата слика – Зошто да се обработува органскиот отпад? (03.04.2025)

Обуката започна со запознавање на учесниците со влијанието на органскиот отпад врз животната средина, емисиите на метан и принципите на кружната економија. Присутните дискутираа за улогата на компостирањето во одржливото земјоделство и како локалните институции можат да предводат вакви иницијативи.

Во вториот дел, беше објаснета науката зад процесот на компостирање — фазите на распаѓање, улогата на микроорганизмите, и балансот помеѓу „кафеави“ и „зелени“ материјали.

Работниот ден заврши со практична вежба за избор на соодветни локации во с. Ропотово за поставување станици за собирање органски отпад и зелена зона за компостирање.

Клучна порака од учесниците:

„Денес сфативме дека органскиот отпад не е само товар за депониите, туку ресурс што можеме да го искористиме за почиста и позелена општина. Сите заедно мора да работиме на поголема свесност и одговорност кон животната средина.“

---

Ден 2: Техники на компостирање (15.04.2025)

Вториот ден беше посветен на практични техники за градење и одржување на компост. Учесниците учеа како правилно да ги постават материјалите, да го контролираат нивото на влага, аерација и дренажа, како и кога и како да го превртуваат купот компост.

Следуваше сесија за препознавање и решавање на најчестите проблеми во компостирањето — лоши мириси, бавно распаѓање, појава на штетници и вишок на влага.

Работилницата заврши со обука за безбедно постапување со отпадот, прилагодување на практиките за различни сезони и дефинирање на институционални одговорности во системот за компостирање.

Клучна порака од учесниците:

„Компостирањето не е комплициран процес — со малку знаење и грижа можеме да го претвориме отпадот во нешто корисно и вредно за нашите градини и паркови. Ако ова може да се применува во Германија и Швајцарија, зошто да не може и кај нас. Системот го креираат луѓето и сите заедно мора да придонесеме за да живееме поквалитетно.“

---

Ден 3: Употреба на компост и долгорочно планирање (06.05.2025)

Последниот ден беше посветен на користењето на подготвениот компост, неговите придобивки и можности за примена во јавни и приватни зелени површини.

Во рамки на практичната работа, беа поставени станици за собирање органски отпад на однапред определени локации и беше монтирана зелена зона за компостирање во кругот на ЈКП Долнени.

Денот заврши со креирање долгорочен план за работа и одржување на компостот и со давање изјава за медиуми, каде што претставниците на Општина Долнени и ЈКП Долнени ја споделија својата заложба за продолжување на активностите за одржливо управување со органски отпад на територијата на општина Долнени.

Клучна порака од учесниците:

„Горди сме што денес за прв пат во нашата држава поставуваме систем за колективно  компостирање и со тоа стануваме пример за останатите општини во промовирање одржливи практики за преработка на отпад.“

---

Активноста е дел од проектот: „Паметно зелено село за одржлива иднина“, кој се спроведува со поддршка од Фондации Отворено Општество – Западен Балкан.

This post was originally published on this site