Обединети против насилство врз жените и девојчињата!

Марш: Обединети против насилството врз жените и девојките!

Како дел од глобалната кампања за 16 денови активизам против насилството врз жените и девојчињата, нашиот партнер ЕХО (EcHO Educational Humanitarian Organization), во соработка со Општина Штип и поддршката на Гласен Текстилец, организираше инспиративен марш под мотото: „Обединети против насилството врз жените и девојките.“

Средношколците беа дел од настанот, носејќи транспаренти подготвени од младите поддржувачи на ЕХО, испраќајќи гласна порака за солидарност и акција до јавноста. Нивната енергија го засили нашиот повик за промена и покажа дека младите се подготвени да се борат за побезбедна и поеднаква иднина.

Но, нашата борба не застанува на симболиката. Во ЕХО секојдневно работат на зајакнување на жените и девојките преку нивниот Центар за интегративен мултисекторски пристап, обезбедувајќи им пакет услуги на жените изложени на насилство и залагајќи се за правни реформи кои ќе ги заштитат жртвите.

Клучна промена што ја бараат е:

Измена на член 130, став 2 од Кривичниот законик, за да се овозможи сторителите да бидат гонети по службена должност наместо по предлог на жртвите. Оваа промена е од суштинско значење за обезбедување правда и соодветна заштита на жртвите.

Маршот беше повеќе од обична прошетка – беше можност за кратка едукативна сесија и интерактивни дискусии со младите за:

Видовите насилство

Разбивање на стереотипите и предрасудите

Градење култура на еднаквост и превенција

Заедно испративме јасна и силна порака: Насилството е неприфатливо. Само обединети можеме да создадеме вистинска и трајна промена.

Галерија: https://www.facebook.com/share/p/15eaEWy6BS/

#16DaysOfActivism#EndViolence#UnitedForChange#EcHO#GlasenTekstilec

Оваа вест изворно е објавена на веб-страната на Здружение за заштита на работничките права „Гласен Текстилец“