Млади луѓе од Полошкиот регион споделија свои искуства за односот кон медиумските содржини

Средношколци и студенти од Гостивар и поширокиот регион учеа за медиумите на заедницата и предлагаа идеи за теми кои би можеле да се разработат во квалитетни медиумски стории.  

Ова беа само дел од активностите на работилницата за млади која ја организираа Советот за етика во медиумите на Македонија (СЕММ) и Институтот РЕСИС преку проектот „Медиуми на заедницата за посилно граѓанско општество”, поддржан од Владата на Швајцарија преку Цивика мобилитас. Средбата, на која младите се запознаваа процесот низ кој се пишуваат стории и се развива активизам на медиумите на заедницата како Локал Актив, беше трета работилница од овој тип по оние кои се одржаа во Гевгелија и Крива Паланка.

Снежана Трпевска, претседателката на РЕСИС, ја претстави Локал Актив како платформа каде новинари, активисти и млади луѓе од различни региони во Македонија се поврзуваат за заеднички да информираат и да работат на решавање проблеми во локалните средини. Таа најави и план во иднина да се отвори нов медиум на заедницата – Локал Актив Полог – чиј фокус ќе биде Полошкиот Регион и на кој ќе се објавуваат стории за проблемите со кои се соочуваат и граѓаните од Гостивар и околината.

Голем дел од работилницата беше посветен на самите млади и нивните навики за информирање. Тие дискутираа за тоа како доаѓаат до вести, од кои извори се информираат, дали и колку ги проверуваат информациите кои им го привлекуваат вниманието, како и за тоа колку веруваат на локалните медиуми и на инфлуенсерите што ги следат на социјалните мрежи.

Дискусијата покажа дека проверката на информациите и односот кон содржините на социјалните мрежи се прашања со кои младите секојдневно се среќаваат, а работилницата им даде простор да ги споделат своите искуства и дилеми.

Билјана Георгиевска, извршната директорка на СЕММ се осврна на етичките стандарди во медиумите: кои правила мора да ги почитуваат новинарите, кои принципи најчесто се прекршуваат и што носи модернизираниот и надополнет Кодекс на новинарите на Македонија. Таа ги запозна учесниците и со улогата на Советот за етика во медиумите на Македонија.

Младите споделија искуства со штетни, злонамерни или лажни содржини на социјалните мрежи и во медиумите, а поставуваа и прашања за етичките аспекти на конкретни случаи – од известување за трагични настани до вести кои можат да создадат паника.

Во вториот дел од работилницата учесниците работеа на изработка на краток предлог-тема за аналитичка новинарска сторија. Нивната задача беше да посочат конкретен проблем, да предложат соодветни извори и да размислат како една таква сторија може да придонесе за промени во нивната заедница.

Меѓу предложените теми беа третманот и можностите за решавање на проблемот со голем број бездомни кучиња, сајбербулингот како современ проблем што силно ги засега младите, како и влијанието на социјалните мрежи врз нивниот живот и негативните последици од прекумерната онлајн изложеност. Последната тема отвори жива дискусија за ефектите што учесниците или нивните пријатели и роднини ги чувствуваат од постојаното користење дигиталните платформи.

*Содржината на оваа објава е единствена одговорност на Институтот РЕСИС и на Советот за етика во медиумите на Македонија (СЕММ) и на ниту еден начин не може да се смета дека ги одразува гледиштата на Владата на Швајцарија, „Цивика мобилитас“ или на организациите што ја спроведуваат.