Метаморфозис на Светскиот самит за Отворено владино партнерство 2025

Метаморфозис беше дел од Светскиот самит за Отворено владино партнерство, организиран од Владата на Шпанија од 7 до 9 октомври 2025 година во Виторија-Гастеис, Шпанија.

Самитот обедини над 2000 реформатори, лидери и експерти од над 70 земји со една единствена цел: зајакнување на довербата, транспарентноста и демократијата во свет што брзо се менува. Самитот се фокусираше на обновата на јавната доверба, заштитата на граѓанскиот простор и одговорната употреба на податоци и вештачка интелигенција за подобро управување. Усвојувањето на Декларацијата од Виторија-Гастеис од страна на речиси 160 влади и организации ја потврди глобалната посветеност на соработката, интегритетот и отпорноста во демократското управување.

За време на воведната пленарна седница, Самитот ѝ оддаде почит на добрата пријателка на ОВП и поранешна членка на Управниот комитет на ОВП, Хелен Дарбишир. Во нејзина чест, беа објавени првите добитници на првиот повик за апликации во рамките на Фондот за граѓанско општество „Хелен Дарбишир“, во чест на починатата застапничка за пристап до информаци и човекови права. Меѓу овие добитници беше и Фондација Метаморфозис во партнерство со Центарот за граѓански комуникации. Овие грантови ќе ги зајакнат процесите на отворена власт, ќе го одржат ангажманот на граѓанското општество и ќе поттикнат амбициозни реформи меѓу членовите на ОВП.

Како дел од Самитот, Данче Даниловска – Бајдевска, програмска директорка во Фондација Метаморфозис, беше говорничка на панелот „Повеќе од заложбата: Преглед на 15 години од патот на ОВП“. Како подготовка за одбележување на таа годишнина, сесијата направи преглед на главните достигнувања и влијанието на партнерството и преку пристап на обединување на податоците и приказните, сподели темелни податоци за влијанието на ОВП врз политиките, земјите и реформаторите во владата и граѓанското општество во изминатата деценија. Преку формат на брзи излгања, сесијата ги обедини реформаторите и даде можност да се слушнат вистински приказни од националните и локалните власти, граѓанското општество и лидерите на мислење (вклучувајќи ги и некои од членовите основачи) за тоа како ја користеле платформата ОВП за да ги унапредат своите цели.

Во својот говор, Даниловска – Бајдевска зборуваше за 15-годишниот пат на Северна Македонија во рамките на иницијативата, опишувајќи ја како заедница на вредности и платформа за отпорност што ја зајакна транспарентноста, отчетноста и учеството на граѓаните – дури и во периодот на „заробена држава“. Таа се осврна на клучните реформи постигнати преку ОВП, како што се Отворениот трезор, Националниот портал за отворени податоци, регистарот на вистински сопственици и Законот за слободен пристап до информации од јавен карактер, нагласувајќи ја клучната улога на граѓанското општество во ко-креирањето и мониторирањето на шест Национални акциски планови. Истакнувајќи ги откритијата на локално ниво, таа посочи дека се објавени над 280 збирки на податоци од 50 општини, со што се доби меѓународно признание за алатките на Северна Македонија за општинска транспарентност на Светскиот самит на ОВП во Сеул.

Таа понатаму нагласи дека едно од најголемите влијанија на ОВП во Северна Македонија е институционализацијата на граѓанското учество преку Советот за Партнерството за отворена власт и Мрежата на граѓански организации за Партнерство за отворена власт, која сега вклучува повеќе од 75 организации. И покрај предизвиците како ограничен институционален капацитет, политички промени и бавно спроведување на законите, таа нагласи дека вистинскиот успех на ОВП не се мери само преку податоци и усогласеност, туку преку довербата, соработката и културата на отвореност што се изградени помеѓу владата и граѓанското општество. Нејзината клучна порака беше јасна — вистинското влијание на отворената власт не лежи само во спроведените реформи, туку и во тоа како тие ги трансформираат односите, отчетноста и довербата на граѓаните во институциите.

Самитот беше затворен со завршните зборови на Неговото височество, кралот Фелипе VI кој нагласи дека отворената власт е камен-темелник на демократијата и јавната доверба.

The post Метаморфозис на Светскиот самит за Отворено владино партнерство 2025 first appeared on Metamorphosis.

Оваа вест изворно е објавена на веб-страната на Фондација Метаморфозис