Извиднички завет

„Давам чесен збор, дека ќе ја запознаам и сакам својата татковина Република Македонија дека ќе ја прифатам духовната реалност и ќе го барам нејзиното потполно значење, дека секогаш ќе им помагам на луѓето, дека ќе живеам и работам по извидничките закони“ – со овие зборови се заветуваа новите извидници на Извидничкиот поречански одред „Сидро“ на свечена церемонија што се одржа на 17 декември 2016 година во Скопје, во непосредна близина на Камениот мост каде што се наоѓа „сидрото“ симболот на одредот.

Давајќи го заветот, новите извидници станаа дел од семејството на 40 милиони извидници, низ целиот свет. На свечениот настан учествуваа 150 извидници од извидничките одреди од Скопје, и тоа од ИО „Браќа Миладиновци“, ИПО „Јадран“, ИПО „Сидро“ и ИПО „Галеб“.

Покрај новите извидници, на настанот беа присутни и возрасни извидници, ровери, водачи, како и родители, кои беа таму како поддршка на присутните, и се разбира придонесоа кон креирање на прекрасна атмосфера за време на овој свечен извиднички настан.

Церемонијата беше дел од извидничкиот караван, поддржан од Сојуз на извидници на Македонија и Цивика мобилитас.