ИНТЕРВЈУ СО ВЛАДИМИР ЃОРЃЕВСКИ: ЗАЕДНИЧКО КРЕИРАЊЕ НА ЕВРОПСКИ РЕШЕНИЈА ЗА ПОДОБАР КВАЛИТЕТ НА ЖИВОТ

Интервјуираше: Енис Шаќири

BIRC Institute

Владимир Ѓорѓевски е директор на локалната подружница на RYCO во Скопје. Во ова интервју за Институтот BIRC, тој зборува за улогата на младите во процесот на европска интеграција, предизвиците со кои се соочуваат и начините како може да се зајакне регионалната соработка.

BIRC: Дали младите имаат доволно информации за процесот на европска интеграција?

Владимир Ѓорѓевски: Мислам дека не. Сè помалку се заинтересирани за овој процес и многумина сметаат дека е недостижен во брзо време. Односно, не веруваат дека нашата интеграција во ЕУ ќе се случи додека тие сè уште се млади.

BIRC: Кои се главните пречки што ги спречуваат младите да се вклучат во процесите на европеизација и демократизација?

Владимир Ѓорѓевски: Мотивираноста и отвореноста на институциите се клучни. Треба да се креираат инклузивни процеси во кои младите не само што ќе бидат присутни на масата, туку и сериозно консултирани. Нивните препораки треба да се земаат предвид и тие да бидат вклучени во имплементацијата на одржливи решенија.

BIRC: Како може да се подобри регионалната соработка меѓу младите во контекст на европската интеграција?

Владимир Ѓорѓевски: Со заедничко креирање на европски решенија кои го подобруваат квалитетот на животот и животниот стандард: со тргање или намалување на бариерите на границите, меѓусебно признавање на дипломите, создавање еднакви можности за работа и живеење, лесен проток на стоки, повеќе можности за регионална и интеркултурна соработка, како и можности за создавање регионални претпријатија и бизниси. Со вистинска европеизација пред да станеме членки на ЕУ.

BIRC: Дали тековните програми на ЕУ за млади (како Erasmus+) се доволни за промовирање на европеизацијата на Балканот?

Владимир Ѓорѓевски: Не. Потребни се повеќе локални и регионални програми, бидејќи Балканот има свои специфики и предизвици. Младите треба да имаат можност да учат, да дискутираат и да создаваат долгорочни решенија токму во овој контекст. Во спротивно, евроскептицизмот и иселувањето на младите ќе продолжат да растат.

BIRC: Како ефикасно да се спротивставиме на дезинформациите и антиевропската пропаганда што влијае врз младите?

Владимир Ѓорѓевски: Пред сè, со создавање кредибилни извори на информирање и поддршка на професионални медиуми кои немаат скриени интереси. Потребна е и поголема поддршка за млади новинари, создавање простор за граѓаните анонимно да коментираат и известуваат, како и модерни форми на комуникација – социјални мрежи, креативни слики, видеа, интервјуа, подкасти и инфлуенсери што промовираат позитивни вредности.

BIRC: Дали мислите дека постои евроскептицизам кај младите и што го поттикнува тоа?

Владимир Ѓорѓевски: Да, и тој сè повеќе се зголемува. Причините се повеќе: блокадата од Бугарија веднаш по Преспанскиот договор, недоволната координација на лидерството во ЕУ околу агресијата врз Украина, како и спориот процес на реформи дома и слабата видливост на поддршката од ЕУ. Сите овие фактори ја хранат недовербата кај младите.

Овој интервју е подготвен во рамките на проектот „Вклучување на младите за европеизација на Балканот“, спроведен од BIRC Institute од Северна Македонија, НВО GLAS од Црна Гора и CFID од Косово, со поддршка од Фондот за Западен Балкан и кофинансирање од Европската Унија.

Интервјуто е подготвено со финансиска поддршка од Европската Унија. Содржината е исклучива одговорност на авторите и на никаков начин не ги отсликува ставовите на Европската Унија.