Толеранција и вредности на граѓаните 2021

Во извештајот „Толеранција и вредности на граѓаните во Република Северна Македонија“ се анализираат наодите од анкетата „Граѓанско општество“, фокусирајќи се на аспектите на толеранцијата и вредностите кај граѓаните. Ова истражување се спроведува на национално репрезентативен примерок од граѓаните на Република Северна Македонија. Основната цел на истражувањето беше да се разгледаат ставовите на граѓаните во врска со клучните прашања кои имаат влијание на социокултурниот контекст во кој дејствува граѓанското општество.

Истражувањето на толеранцијата и вредностите на граѓаните беше спроведено и во претходните години како дел од различни проекти. На основа на претходните искуства и глобалните истражувања, извештајот е надграден со нови прашања и подобрена структура. Со периодично повторување на истражувањето и неговото објавување во фази, се подобрена употребливоста на извештајот.

Прашалникот е дизајниран врз основа на глобалните истражувања за социо-културните норми, како што се Европската студија на вредности, Европскиот барометар и Цивикус – Индексот на граѓанското општество. Дополнителните прашања се изведени од претходните истражувања на МЦМС кои ја истражуваа толеранцијата и вредностите на граѓаните.

Анкетата беше спроведена во август 2023 година, на репрезентативен примерок од 1.012 испитаници. Популациската рамка на примерокот вклучува население постаро од 18 години, со критериуми за репрезентативност кои вклучуваат пол, етничка припадност, возраст, место на живеење и региони.

Од 1.012 испитаници, 51,3 % беа жени, а 48,7 % мажи. Во однос на етничката застапеност, етничките Македонци беа застапени со 69,8 %, етничките Албанци со 25,1 %, додека други етнички групи беа застапени со 5,1 %. Во однос на местото на живеење, 32,7 % од испитаниците живеат во рурални области, 39,5 % во урбани области, а 27,8 % во градот Скопје. Подробен преглед на примерокот е даден во прилогот.

Собраните податоци се обработени со анализа на честота и пропорција на одговорите. Податоците имаат ниво на доверба од 95 % и грешка од +/- 3 %. Резултатите се прикажани преку графикони за целокупниот примерок, а исто така се презентирани и бројките. Кога е применливо, се прикажуваат и трендовите во однос на претходните истражувања, на пример, од 2015 година, за податоци што можат да се споредат со нив.

Социо-демографските анализи за помалубројните етнички заедници и политичките партии со помалку симпатизери не се коментирани поради нивната мала застапеност во националниот примерок. Во извештајот, некои табели и графикони не ги прикажуваат резултатите за одговорите „не знам“ и „без одговор“, поради што збирот на сите одговори не е 100 %. Ова е направено за да се поедностави прикажувањето на резултатите.