Постигнувањата на грантистите на Цивика мобилитас: Мали грантови I дел
Кога ќе се споменат „мали акциски грантови“, многумина можеби помислуваат дека нивните резултати се скромни. Но, искуствата на организациите кои ги добиле овие грантови, како и на луѓето на кои им се наменети, покажуваат дека ефектите од нив се далеку од мали. Називот „мали“ се однесува на буџетот, но импактот е многу поголем.
Со оваа публикација сакаме да ги споделиме приказните на 22 граѓански организации кои добија поддршка од Цивика мобилитас за да ги решат предизвиците на нивните заедници.
Тие се посветија на решавање на важни проблеми, како што се интеграцијата на бездомните лица во општеството, економскиот развој на девојките и жените во руралните средини, пристапот до мигрантите, и независниот живот на лицата со Даунов синдром.
И покрај ограничените средства, овие проекти го опфатија спектарот на општествени проблеми, од иселувањето, младите и нивното волонтирање, до различностите и нивното влијание на животот на децата, културата на велосипедизмот, па дури и евидентирањето на државниот имот и урбанистичкото планирање. Иако овие 22 приказни се сведоштва на постигнувањата на грантистите на Цивика мобилитас, тие не претставуваат крај на патот. Некои од проблемите на кои се фокусираа се значајни и комплексни. Сепак, чекорите направени од овие организации се значајни и ја нагласуваат важноста на продолжување на борбата за општествени промени. Верата во постигнатото ќе ни биде поттик да продолжиме заедно, инспирирани од успехот, кон нови напори за подобрување на нашето општество.
