Како да се реагира под притисок: сниматели и медиумски работници на обука во Велес

На 27 и 28 март 2026 година, во Велес, Здружението на новинарите на Македонија, во рамки на Тренинг-Академијата за новинари и медиумски работници (T-AJM), организираше дводневна обука за физичка безбедност, наменета за сниматели и други медиумски професионалци.

Обуката беше поставена како спој на теоретски сесии, дискусии и практична работа, со фокус на реалните ризици со кои медиумските работници се соочуваат на терен. Учесниците работеа на теми поврзани со различни форми на притисоци врз медиумските работници, препознавање високоризични ситуации, родово специфични безбедносни предизвици, како и со правната и институционалната рамка за заштита на медиумските работници.

Посебен акцент беше ставен на симулациите и практичните вежби. Во една од нив, учесниците работеа на сценарио за известување од сообраќајна незгода во која е вклучена јавна личност, при што вежбаа проценка на ризик, реакција под притисок и носење одлуки во чувствителна и напната ситуација. Во друг дел од програмата, преку практична работа, тие се запознаа со користење заштитна опрема, правилно ракување со панцир и шлем, како и со подготовка на неопходна опрема за работа во кризна средина.

Вториот ден беше посветен и на подготовка за известување од насилни протести и други настани со зголемен ризик, при што се работеше на проценка на теренски услови, избор на безбедни рути за движење и основна логистика за работа во опасни средини. Практичната вежба за заштита и помош на терен им овозможи на учесниците да ги поврзат информациите од модулите со конкретни ситуации што можат да ги затекнат во секојдневната работа.

Обуката беше наменета за сниматели и други медиумски работници, а пристапот беше прилагоден и за учесници со помало искуство, и за оние кои веќе имаат долгогодишна работа на терен.

Обучувачи беа Зоран Ричлиев и Кристина Атовска, кои преку работа со реални примери, сценарија и интеракција со учесниците отворија важни прашања за личната безбедност, подготовката пред излегување на терен и однесувањето во услови на зголемен ризик.

Обуката се одржа со финансиска поддршка на Европската Унија, во рамки на проектот „Тренинг-Академија за новинари и медиумски работници – Т-АЈМ“. За содржината е одговорно исклучиво Здружението на новинарите на Македонија и таа нужно не ги одразува ставовите на Европската Унија.