Author: Здружение ХЕЛСИНШКИ КОМИТЕТ ЗА ЧОВЕКОВИ ПРАВА НА РЕПУБЛИКА МАКЕДОНИЈА Скопје

Блупринт групата за реформи во правосудството ја истакнува својата загриженост за одлуката на Управниот одбор на Академијата за судии и јавни обвинители донесена на 235тата седница на 24.06.2025 година со која беше назначен посебниот советник на министерот за правда, Андреја Весов за член на Програмскиот совет на Академијата за судии и јавни обвинители.
Имено, според член 19 од Законот за Академијата за судии и јавни обвинители, како член на Програмскиот совет може да биде избран „раководен државен службеник од Министерството за правда со најмалку осум години работен стаж на работи од областа на правосудството, по положен правосуден испит.“ Оттаму, според јавно достапните информации, членот на Програмскиот совет кој е назначен е вработен како посебен советник на министерот за правда, позиција што не се квалификува како раководен државен службеник согласно Законот за административни службеници, туку како ангажман на определено време според Законот за вработените во јавниот сектор.
Дополнително, неговата поврзаност со одредена политичка партија и неодамнешна кандидатура за пратеник на последните парламентарни избори во Република Северна Македонија сериозно ја нарушува перцепцијата за независност и непристрасност на Академијата, особено во процесот на избор и обука на идни судии и јавни обвинители. Академијата треба да биде деполитизирана, професионална институција чија главна мисија е зајакнување на правосудниот кадар и унапредување на владеењето на правото.
Програмскиот совет мора да биде составен од професионалци со несомнено искуство и интегритет како би се обезбедило објективен процес на селекција и прием на слушатели на Академијата, ова особено што во изминатите години речиси во секоја генерација на прием на слушатели на Академијата за жал се соочуваме со различни сомнежи или нерегуларности кои го поткопуваат интегритетот на оваа клучна институција.
Оттаму, апелираме до надлежните институции за доследно почитување на законските одредби при избор и именување на членови во телата на Академијата, со цел да се заштити нејзината независност, стручност и интегритет. Само преку транспарентно и законито постапување може да се обезбеди доверба во процесите на обука и селекција на идните судии и јавни обвинители.

Блупринт група за реформи во правосудството:
– Институт за човекови права (ИЧП)
– Коалиција „Сите за правично судење“ (КСПС)
– Македонско здружение на млади правници (МЗМП)
– Хелсиншки комитет за човекови права
– Центар за правни истражувања и анализи (ЦПИА)

Блупринт групата за реформи во правосудството изразува сериозна загриженост за начинот на кој Судскиот совет на Република Северна Македонија (ССРСМ) го спроведе изборот на ВД претседател на Основниот Кривичен суд Скопје на јавната седница одржана на 3 јули 2025 година.
На седницата беа избрани повеќе ВД претседатели на основни судови поради истекување или престанување на мандатот на досегашните претседатели, но немаше конзистентност во начинот и постапката на избор на новите ВД претседатели.
Поточно, за различни кандидати се применуваа различни критериуми и процедури, што фрла сомнеж врз независноста и кредибилитетот на Судскиот совет. Според досегашната пракса на ССРСМ, при предлагање на судија за ВД претседател се наведува причината за предлогот, со оглед дека законската рамка не предвидува детални критериуми за определување на ВД претседател, освен одредбата од Законот за судови1 која гласи: „Во случај на разрешување или престанок на мандатот на претседателот на судот, до избор на нов претседател на судот, Судскиот совет на Република Македонија од редот на судиите во судот определува вршител на должноста претседател на судот кој во последната година е оценет со највисока позитивна оцена и во однос на останатите судии има добиено најголем број бодови“.
И покрај тоа што оценувањето на судиите се спроведува на секои четири години, оваа одредба не треба да се толкува исклучиво како последната календарска година, туку како „последно спроведено оценување“, согласно духот на законот.
Досега, при избор на ВД претседатели се предлагаше истиот претседател да продолжи да ја врши таа функција додека да биде избран нов, доколку има услови за тоа, како што беше случај на вчерашната седница при изборот на ВД претседатели на Гостивар и Дебар. Во други случаи, за ВД претседатели се предлагале судии кои имаат најголем стаж или највисока оценка добиена при последното оценување.
Меѓутоа, во конкретниот случај со Основниот кривичен суд Скопје, вчерашниот предлог за ВД претседател е спорен бидејќи во текот на 2025 година беше спроведено оценување на судиите од овој суд во рамки на нивното кандидирање за судии во Апелациониот суд Скопје. Тоа значи дека во моментот има судии кои се оценети „во последната година“, како што е наведено во Законот за судови. И покрај тоа, не беше наведено дали кандидатот кој беше предложен и избран за ВД претседател има добиено најголем број бодови во однос на останатите судии, согласно барањата на одредбата во Законот за судови, што ја доведува во прашање транспарентноста и законитоста на процесот и предизвикува сомнежи за пристрасност и влијанија во одлуките на ССРСМ.
Сметаме дека секое поинакво постапување при носење на одлуки фрла сомнеж за притисоци и влијанија врз судската власт со што дополнително се поткопува довербата во Судскиот совет, а со тоа и во целиот механизам на владеење на правото и правната држава.
Како група која подолго време ја следи работата на правосудството во целина, потенцираме дека почитувањето на законите и постапките кои се предвидени согласно законските регулативи треба да бидат единствен императив и стандард преку кој се гарантира независноста и самостојноста на судиите. На тој начин се гарантира и владеење на правото, особено што, по препораките од Оценската мисија, ССРСМ се обврза дека ќе ги вложи сите напори да работи транспарентно, конзистентно и согласно законските одредби и процедури.

Блупринт група за реформи во правосудството:
– Институт за човекови права (ИЧП)
– Коалиција „Сите за правично судење“ (КСПС)
– Македонско здружение на млади правници (МЗМП)
– Хелсиншки комитет за човекови права
– Центар за правни истражувања и анализи (ЦПИА)

Извештајот е дел од проектот на “Превенција и заштита од родово базирано насилство во Северна Македонија – Фаза II”, имплементиран од Фондот за население на Обединетите нации УНФПА и поддржан од Британската амбасада.
Проектот има за цел да ги зголеми напорите на државните институции и организациите на граѓанското општество за ефикасно спроведување на Законот за спречување и заштита од насилство врз жените и семејно насилство на национално и локално ниво. Со поддршка на сеопфатни услуги за родово базирано насилство, проектот ќе придонесе мерките за превенција и заштита да бидат достапни низ целата земја.
Во јули 2024 година Хелсиншкиот комитет започна со спроведување на проектот „Поддршка на НВО за обезбедување правна помош на жртви на РБН и одржливи сервиси за мобилизирање локална поддршка” поддржан од страна на Фондот за население на Обединетите нации. Главната цел на соработката е да се поддржи граѓанската организација да има одржливост и да обезбеди долгорочни услуги за преживеаните и жртвите на родово базирано насилство. Секој придонес што го добива Комитетот, го вложува директно кон сервисот за бесплатна правна помош, осигурувајќи дека дадената поддршка има опипливо и трајно влијание.
Одржливото финансирање е од клучно значење не само за одговор на непосредните потреби, туку и за изградба на систем и сервис на бесплатна правна помош кој непречено и целисходно ќе ги штити правата и достоинството на граѓаните.
Оттаму, овој извештај ги претставува податоците за обезбедената правна и параправна помош на жртви на родово базирано и семејно насилство, како и мониторингот на судски случаи поврзани со родово базирано и семејно насилство, во периодот од јули 2024 година до март 2025 година.
Дополнително, накратко ќе бидат презентирани заклучоците од форумите со жени во ситерегиони на државата надвор од Скопје.

Хелсиншкиот комитет за човекови права, на 30 јуни, 2025 година во Скопје го презентираше  „Извештајот за озбебедена бесплатна правна помош на жртви на родово базирано и семејно насилство“, кој беше подготвен во рамки на проектот „Превенција и заштита од родово базирано насилство во Северна Македонија – Фаза II“, поддржан од Фондот за население на Обединетите нации (УНФПА) и Британската амбасада во  Скопје.
Овој извештај  што го подготви Наташа Петковска, правна советничка во Хелсиншкиот комитет, го опфаќа периодот од јули 2024 до март 2025 година и ги прикажува резултатите од обезбедената правна и параправна помош на  вкупно 383 жени, вклучително и случаи каде што беа ангажирани адвокати за судско застапување на жртвите.
На настанот, Тона Карева Талеска и Александра Трајановска, правни советнички во Хелсиншкиот комитет ги презентираа клучните согледувања и препораки што произлегуваат од теренската работа на Хелсиншкиот комитет, вклучително и наодите од форумите со жени во сите региони на земјата, каде беа идентификувани клучните системски бариери за пристап до правда и поддршка.
Присутните претставници од МВР, од другите надлежни институции и од граѓанските организации учествуваа во дискусијата за резултатите од извештајот од која произлезе дека е потрбно понатамошно унапредување на правната заштита и институционалната поддршка за жртвите на родово базирано и семејно насилство во која поактивно треба да се вклучат сите релевантни чинители.

На социјалните мрежи кружи вознемирувачко видео со физичко насилство врз четиригодишно дете, проследено со фотографија на која се видливи повредите на неговото лице и тело. Децата, поради нивната возраст и зависност од возрасните се особено ранливи на последици од насилство – особено кога тоа доаѓа од родител, старател или друго блиско лице.
Хелсиншкиот комитет најостро го осудува овој чин и бара најстрога казна за сторителот на насилство врз детето, како и засилена институционална заштита на најранливите членови на општеството.
Воедно, упатуваме апел до јавноста да се воздржи од споделување лични податоци, фотографии и информации за дете-жртва на насилство, особено на интернет и социјалните мрежи. Дури и кога е водено од добра намера или сочувство, ваквото споделување може да предизвика дополнителна траума, стигматизација и долгорочни психолошки последици врз детето.
Наместо тоа, ги повикуваме граѓаните да постапат одговорно и секоја информација или сомнеж за насилство да ја пријават до релевантни организации за човекови права или институциите – Центрите за социјална работа и Министерството за внатрешни работи. Само преку стручно постапување може да се обезбеди ефективна заштита и поддршка на детето. Јавноста има моќ да биде сојузник во борбата против насилството – таа моќ мора да се користи одговорно, со грижа и почит кон секое дете.
Хелсиншкиот комитет за човекови права ќе го следи овој случај со особено внимание и ќе инсистира на целосно и ефикасно постапување од страна на надлежните институции со должно внимание, а имајќи го предвид најдобриот интерес на децата и нивна заштита.

Хелсиншкиот комитет за човекови права, во рамки на проектот „Фундаменталните човекови права на прво место-активен придонес за владеење на правото“, финансиран од Европската Унија како дел од програмата, IPA III Civil Society Facility and Media Programme 2023 , согласно Договорот за грант потпишан меѓу Хелсиншкиот комитет за човекови права и Европската Унија бр. IPA III/2024/461-642“, спроведува постапка на прибирање на понуди, со упатување на покана – барање за доставување на понуди.
Потребно е надоградување на Дата базата за бесплатна правна помош (опишано под точка 1).
За горенаведениот предмет понудите да бидат испратени најдоцна до 27.06.2025 година (петок) до 16:00 часот, по електронска пошта на jana.sotirovska@mhc.org.mk.
Со оваа покана ви ја доставуваме потребна документација која ги содржи сите информации кои ќе ви помогнат за изработка на понудата.
1 Опис на бараната набавка:
Хелсиншкиот комитет за човекови права го спроведува проектот „Фундаменталните човекови права на прво место-активен придонес за владеење на правото“, финансиран од Европската унија. Во рамки на проектот е потребно надоградување на постоечката Дата база за бесплатна правна помош (во продолжение БПП).
1.1 Опис на бараните услуги:
Дата базата за БПП служи за евидентирање на корисниците на бесплатна правна помош, во согласност со домашните и меѓународните стандардни за пристап до правда и заштита на лични податоци. Базата истовремено обезбедува статистичка анализа. Прегледот и унапредувањето на платформата треба да се фокусира на:
–ревизија на постоечките функционалности на дата базата, утврдување и корекција на постоечки недостатоци,
–следење на тековни предмети со вклучување на систем за предупредување за изминување на законските рокови од страна на институциите,
 –подобрување на системот за вадење статистики и анализи.

Општи информации

Од понудувачот се бара да достави најекономична и најдобра понуда во согласност со горенаведените материјали. Со тоа што во понудата секоја од горенаведените ставки треба да биде посебно образложена. Критериумите за избор на понудата се наведени под точка 3 на овој документ.
Цените при наведената понуда да бидат изразени без ДДВ.

Критериум за доделување на договорот за набавка

Критериумите за доделување на договорот за набавка се:

економски најповолна понуда
најдобар квалитет
најкраток рок на испорака

За носител на набавката ќе биде избран оној понудувач чија понуда е најсоодветна според наведените критериуми.

Евалуација на понудите

При евалуацијата на понудите ќе се земат предвид понудените цени, квалитетот на понудата и рокот на испорака. Евалуацијата на понудите ќе се врши од страна на Комисијата, формирана од страна на Хелсиншкиот комитет за човекови права за спроведување на постапкатa.
Доколку вашата понуда биде избрана ќе бидете информирани;
Во случај на потреба од дополнително појаснувања, слободно контактирајте не.
Напомена: Проектот е ослободен од ДДВ. По направен избор за најповолен понудувач ќе биде доставено решение и потврда од УЈП и СЕП. 

„Заедно за правда за деца: едукација, соработка, професионални услуги и усогласување со стандардите“ беше темата на состанокот што се одржа на 13 јуни, на кој се потврди заедничката заложба за систем каде секое дете ќе има еднакви шанси, еднаква заштита и достоинствен третман.

Тона Карева Талеска од Хелсиншкиот комитет за човекови права детално го претстави проектот „Зајакнување на човековите права и услуги за децата и ранливите лица во ризик во затворени институции“.

Главни активности се следење и директна поддршка, меѓу другото и со бесплатна правна помош и психосоцијално советување, зајакнување на капацитетите и застапување за промени, како и превенција и заштита, во соработка со Министерство за социјална политика, демографија и млади и Министерството за правда.

На заедничкиот состанок учествува и претставниците на Македонското здружение на млади правници кои го презентираат проектот „Младите правници за поприлагоден систем за правда за деца“, потоа Управата за извршување санкции, Воспитно поправниот дом Волковија, Заводот за социјални дејности, Народниот правобранител, Адвокатската комора на РСМ, Државниот совет за превенција на детско престапништво и правда за деца и УНИЦЕФ.

Проектот „Зајакнување на човековите права и услуги за децата и ранливите лица во ризик во затворените институции“, што го спроведува Хелсиншкиот комитет за човекови права, е финансиран од ЕУ.
Главна цел на проектот е да се придонесе кон подобрување на услугите за децата и ранливите лица во ризик во затворени институции преку пристап заснован на човекови права.
Главни активности се:
МОНИТОРИНГ И ПОДДРШКА
– Посети во мали групни домови, ЈУ за згрижување деца со воспитно-социјални проблеми и нарушено однесување и станбени единици во Демир Капија;
-Развој на сеопфатна анализа за проценка на потребите за сите целни групи;
-Инфо-сесии за правата и обврските за целните групи;
– Бесплатна правна помош и психосоцијално советување;
ГРАДЕЊЕ КАПАЦИТЕТИ И ЗАСТАПУВАЊЕ
– Зајакнување на капацитетите за релевантниот персонал кој работи со целните групи;
– Развој на прирачник базиран на човекови права за релевантниот персонал кој работи со целните групи;
– Тркалезни маси со релевантните засегнати страни;
– Застапување за промени;
ПРЕВЕНЦИЈА И ЗАШТИТА
– Мапирање, вклучување и поддршка на млади во ризик во Скопје, Прилеп и Штип;
– Инклузивни работилници за семејства и млади во ризик;
– Соработка со Министерство за социјална политика, демографија и млади и Министерството за правда за изготвување наставна програма за превенција и заштита на деца во ризик;
– Да се подобрат условите и унапредат човековите права на децата и ранливите лица во ризик во затворени институции.
– Да се зајакнат капацитетите на релевантниот персонал кој работи со деца и ранливи лица во ризик.
– Да се овозможи соработката помеѓу локалните активисти и релевантните чинители преку поттикнување на вклученоста на заедницата на децата и ранливите лица во ризик.

 Хелсиншкиот комитет за човекови права, во рамки на проектот „Фундаменталните човекови права на прво место-активен придонес за владеење на правото“, финансиран од Европската Унија како дел од програмата, IPA III Civil Society Facility and Media Programme 2023 , согласно Договорот за грант потпишан меѓу Хелсиншкиот комитет за човекови права и Европската Унија бр. IPA III/2024/461-642“, спроведува постапка на прибирање на понуди, со упатување на покана – барање за доставување на понуди.
Потребно е ангажирање на два експерта за припрема и одржување на тродневна ЕУ Летна академија за човекови права, со изготвување на финален извештај (опишани под точка 1).
За горенаведениот предмет понудите да бидат испратени најдоцна до 20.06.2025 година (понеделник) до 16:00 часот, по електронска пошта на jana.sotirovska@mhc.org.mk.
Со оваа покана ви ја доставуваме потребна документација која ги содржи сите информации кои ќе ви помогнат за изработка на понудата.
1. Опис на бараната набавка:
Хелсиншкиот комитет за човекови права го спроведува проектот „Фундаменталните човекови права на прво место-активен придонес за владеење на правото“, финансиран од Европската унија. Во рамки на проектот потребен е ангажман на два експерта за припрема на курикулум и материјали за ЕУ академијата за човекови права, одржување на тродневната академија и изготвување на извештај.
1.1 Опис на бараните услуги:
Експертите кои ќе бидат ангажирани треба да изготват и имплементираат интерактивна работилница за симулација, фокусирана на процесот на пристапување кон ЕУ со посебен фокус на човековите права. Учесниците ќе бидат поделени во групи кои ќе претставуваат различни заинтересирани страни – држави или тела на ЕУ. Секоја група ќе има специфични цели, вклучувајќи преговарање на услови за пристапување, како и адресирање на прашања поврзани со човековите права и промоција на владеењето на правото, имплементирани преку сценарија кои одразуваат реални комплексности. Работилницата треба да овозможи практично, непосредно искуство за учење, кое ќе им помогне на учесниците да го применат своето знаење за процесите на ЕУ и човековите права во динамична, колаборативна средина. По симулацијата, треба да се спроведе сесија за анализа и дискусија, со цел да се рефлектира врз користените стратегии, предизвиците со кои се соочиле и постигнатите резултати. Овие сесии ќе помогнат учесниците подобро да го разберат применувањето на принципите на човековите права во практичен аспект.
*Предвидениот модел на академијата соодвествува со Model European Parliament (MEP); Model United Nations (MUN);

Општи информации

Од понудувачот се бара да достави предлог курикулум, финансиска понуда и две релевантни референци во согласност со горенаведените материјали. Критериумите за избор на понудата се наведени под точка 3 на овој документ.
Цените при наведената понуда да бидат изразени без ДДВ.

Критериум за доделување на договорот за набавка

Критериумите за доделување на договорот за набавка се:

економски најповолна понуда
најдобар квалитет
најдобар предлог-курикулум

За носител на набавката ќе биде избран оној понудувач чија понуда е најсоодветна според наведените критериуми.

Евалуација на понудите

При евалуацијата на понудите ќе се земат предвид понудените цени, рокот на испорака и квалитетот на материјалите. Евалуацијата на понудите ќе се врши од страна на Комисијата, формирана од страна на Хелсиншкиот комитет за човекови права за спроведување на постапкатa.
Доколку вашата понуда биде избрана ќе бидете информирани;
Во случај на потреба од дополнително појаснувања, слободно контактирајте не.
Напомена: Проектот е ослободен од ДДВ. По направен избор за најповолен понудувач ќе биде доставено решение и потврда од УЈП и СЕП. 

Шестата по ред Парада на гордоста/Скопје Прајд, годинава ќе се одржи на 21 јуни.
Националната мрежа против хомофобија и трансфобија денеска одржа прес-конференција посветена на овогодишното издание на Парадата на гордоста, чија што појдовна точка, како и досега, ќе биде во паркот „Жена-борец“, каде во 18 часот ќе започне собирањето на учесниците, а во 19 часот по кратките поздравни говори ќе започне протестниот марш по скопските улици.  Оваа година, маршот на Скопје Прајд добива нова рута – симболично и буквално.
Ова не е прослава – ова е протест. Нема јавна програма, нема забава – само отпор.
Во изминатите месеци, видовме како образовниот систем го брише секое спомнување на нашите идентитети, нашите приказни, нашето постоење.Зголеменото насилство, омразата и исмевањето во училиштата не се случајни – тие се последица на институционален срам и молк.Наместо заштита, образовните политики нудат невидливост. Наместо грижа – негирање.И токму затоа ќе застанеме пред ова Министерство, гласни и непокорни – затоа што младите заслужуваат подобро. Затоа што животите на квир учениците вредат, порача Стефан Петровски, активист.
Пред Министерството за образование ќе бидеме гласни за младите ЛГБТИ+ луѓе чија реалност се избришани идентитети и системско насилство. Пред Владата ќе ги испратиме нашите пораки:
– Доста е од молк за Кочани– Доста е од игнорирање на Законот за правно признавање на род– Доста е од воздржаност пред геноцид
Оваа година слоганот на Парадата на гордоста во Скопје гласи „Ќе (оп) стоиме заедно!“
Овој слоган не е случаен. Тој го носи нашето искуство на преживување, но и нашата одлучност – не само да опстоиме, туку да опстоиме заедно. Во време на политички притисоци, говор на омраза, институционално молчење и глобални неправди, нашиот одговор е заедништво, солидарност и радикална грижа.
Протестираме не заради традиција, туку затоа што е потребно. Затоа што многу ЛГБТИК+ луѓе и понатаму се третираат како невидливи, несигурни и незаштитени. Затоа што транс лицата сè уште чекаат правно признавање на родот. Затоа што образованието се чисти од секакво споменување на нашите животи. Затоа што сакаме да живееме во општество во кое телата, љубовта и идентитетите нема да се сметаат за закана. Скопје Прајд 2025 не е само настан – тоа е движење. И секој што ќе застане со нас, придонесува за промена“, кажа Лила Милиќ, активистка за правата на трансродовите луѓе.
Има многу причини за протест оваа година и не сметаме дека има простор за забава на Парадата на гордоста.
Секоја година Министерството за внатрешни работи покажува високо ниво на професионалност во обезбедувањето на учесниците на Прајдот, полициските службеници успеваат да не предизвикаат страв и тензија кај учесниците.
Во периодот на оджувањето на Парадата на гордоста, секоја година се соочиме со сериозен говор на омраза. МВР го следи говорот на омраза, а ќе ги следиме и ние сите  овие појави и ќе известуваме за сите случувања, кажа Уранија Пировска, извршна директорка на Хелсиншкиот комитет за човекови права.
Ги повикуваме сите – ЛГБТИК+ луѓето, нашите сојузници, пријатели, колеги, избрани и биолошки семејства – да излезат со нас на 21 јуни. Да покажеме дека сме многубројни, дека не се плашиме, и дека стоиме рамо до рамо за општество засновано на еднаквост, слобода и почит.

Хелсиншкиот комитет за човекови права, за потребите на проектот „Safe Spaces for all: Bridging Gaps in LGBTIQ+ inclusion“, има потреба од ангажирање на Психолог/психотерапевт.
Предвидени задачи (опис на позицијата) 

Одржување онлајн психотерапевтски сесии;
Одржување психотерапевтски сесии во живо;
Извештаи за одржани сесии.

Квалификации: 
Образование и работно искуство 

Завршени додипломски студии;
Завршена психотераписка школа, или во завршна фаза во која е дозволена работа под супервизија.
Најмалку 2 години релевантно работно искуство во ваква или слична активност;

Технички вештини 

Напредно познавање на MS Office: Word, Excel, PowerPoint (задолжително), искуство со користење на Teams и One Drive за работни комуникации и соработка (пожелно)

Знаење и други вештини 

Вештини на советување;
Поседување на емпатија.

Систем на вредности:
Во нашата организација, ги негуваме и почитуваме основните човекови вредности за кои се залагаме во нашето работење и веруваме во следните основни вредности кои нè водат во секојдневната работа и односите со нашите колеги и сите засегнати страни:

Искреност – Отвореност и транспарентност во комуникацијата, градење на доверба помеѓу сите членови на тимот.
Иновација – Постојан стремеж кон создавање нови решенија и подобрување на нашите активности и услуги со користење на современи технологии и методи.
Тимска работа – Соработка и поддршка на колегите, воедно почитување на разликите и различните перспективи на секој поединец.
Образование и развој – Инвестирање во личниот и организацискиот развој преку континуирано учење и професионално усовршување.
Одговорност – Преземање лична одговорност за сопствените дела и одлуки, посветеност на постигнување на заедничките цели на организацијата.
Еднаквост и инклузија – Поттикнување вклучување и еднакви можности за сите, независно од полот, родот, етникумот, религиозната определба, сексуалната ориентација или други основи за различност.
Солидарност – Поддршка на нашите колеги и заедницата во време на потреба, работа на создавање инклузивна средина која охрабрува различни гласови и перспективи.
Почит – Уважување на секого како поединец, со сите негови вредности и уверувања.

Како да се пријавите 
За да се пријавите, Ве молиме да доставите:

CV (на англиски јазик)
Мотивациско писмо (на македонски јазик) за Вашиот интерес и квалификации за позицијата, во кое би сакале да прочитаме за тоа како Вашето досегашно работно искуство и образование е релевантно за потребните знаења, вештини и работните задачи предвидени за оваа позиција (не повеќе од 250 зборови)

Вака подготвената пријава треба да ја пратите по електронска пошта на helkom@mhc.org.mk со наслов ПСИХОЛОГ. Рокот за пријавување е заклучно со 20 јуни, 2025 година. Само кандидат/к/ите кои ќе ја поминат првата фаза на разгледување на пријавите ќе бидат контактирани и повикани на интервју.