Граѓаните за промена #22

ЈУЛИ-СЕПТЕМВРИ 2025 | Преземи го магазинот

Ајде да решиме заедно!

„Овие протести покажаа дека храброста и истрајноста можат да променат многу. Од борба за воздух – до пример за човечност и заедништво. Нека ова биде инспирација и за другите иницијативи низ Македонија“,  вака им се обрати на собраните граѓани еден од членовите на независната иницијатива „Стоп за Вардариште“ кои 40 дена преку протест се бореа против загадувањето од депонијата Вардариште. Иницијативата беше на граѓаните кои побараа чист воздух, здрава животна средина и одговорни институции. Тие јасно ги кажаа своите барања и ги доставија до надлежните институции. Протестот го ставија во мирување дури откако почнаа да се реализираат дел од нивните барања за да им дадат простор на институциите да си ја завршат работата. Но предупредија, „ако процесот застане, ако ветувањата не се исполнат, повторно ќе се вратиме, посилни и побројни од кога било!“

Ваквите иницијативи се ветер во грб за граѓанскиот ангажман. Иако често слушаме дека граѓаните се незаинтересирани, рамнодушни, пасивни, сепак, во секој дел на државата можат да се најдат активисти кои неуморно работат на нивните цели. Можеби информациите за нивните активности не се многу јавно експонирани, но таму се, посветени на луѓето со кои работат и истрајни во тоа што сакаат да го постигнат.

Голем дел од нас се дел од тој граѓански ангажман. Некогаш не сме свесни дека со учеството во некои од активностите ја градиме таа активистичка мрежа. Некогаш тоа се протести, но почесто се обуки, работилници, детски и младински кампови, теренски акции, мини кампањи, дебати, анализи… Сите овие активности овозможуваат да ги градиме нашите знаења и вештини за да ги употребиме барајќи и придонесувајќи кон промените во нашите заедници и во целото општество. Никој од вклучените во ваквите активности не е исклучен од интеракции со околината преку кои влијае на другите. На тој начин, свесно или несвесно, сите придонесуваме кон граѓанскиот активизам кој ни помага да ја зајакнеме демократијата одоздола. Граѓанскиот ангажман информира, вклучува и ги држи одговорни институциите. Тој е најбрзиот пат локалните проблеми да станат јавни приоритети – од чист воздух и безбедни улици, до фер буџети и подобри услуги. Активизмот гради доверба и солидарност меѓу различни групи, создава практични вештини кај младите, ја зголемува видливоста на жените и маргинализираните, и ја мобилизира приватната и јавната поддршка за заедничко добро. Најважно, активизмот ја претвора рамнодушноста во учество: од „некој друг нека реши“ во „ајде да решиме заедно!“.

Новиот број на „Граѓаните за промена“ е покана да се вклучите: да прашате, предложите, волонтирате, донирате, гласате и создавате. Зашто граѓанскиот ангажман не е еднократен настан – тоа е навика што го подобрува секојдневието и ја прави нашата заедница посилна, поправедна и поотпорна.

Активистите од #стопзавардариште на сите што се двоумат им порачаа – „запомнете, промената не доаѓа сама. Ние сме тие што ја носиме!“