RRËFIME URBANE: KUFIJTË E PADUKSHËM TË DIJES

Shkruan: Lorik idrizi

Në këtë kohë fushate, pa dashur ta amnistoj politikën, e cila sigurisht mban një pjesë të madhe të fajit për ngecjet e shoqërisë, duhet pranuar se jo gjithçka është në duart e saj. Politika nuk i ka as të gjitha zgjidhjet dhe as nuk mund të mbajë mbi supe të vetme shpresat për ndryshim. Shumë probleme në Maqedoninë e Veriut janë më tepër shoqërore sesa politike.

Shpesh i gjykojmë partitë politike për punësimet klienteliste që i përdorin për të ruajtur votën, por rrallë e kemi diskutuar pse qytetarët kanë aq shumë lakmi për një vend pune në administratë.

Është e çuditshme si shumë të rinj me tituj magjistrature, madje edhe me ambicie për doktoraturë, vazhdojnë të ëndërrojnë për një vend pune në administratë. Kjo ndodh në një kohë kur mjafton një kërkim i thjeshtë në rrjete sociale për të gjetur dhjetëra mundësi bursash, programesh shkëmbimi apo mobiliteti studimor jashtë vendit. Në epokën e “Facebook-ut” dhe algoritmeve, mungon jo mundësia, por ëndrra dhe dëshira për të dalë jashtë, për të prekur dijen e botës dhe për ta sjellë më pas në vend si shkëndijë për ndryshime shoqërore.

Asgjë nuk do të ndryshojë pa u arritur diversifikimi i dijes. Përveç programeve si Erasmus, shumë mundësi të tjera ndërkombëtare mbeten të pashfrytëzuara, jo sepse të rinjtë nuk janë të aftë t’i plotësojnë kërkesat teknike, por sepse mungon aspirata, kurioziteti dhe pasioni për të marrë përsipër këto sfida.

Dija dhe mobiliteti i dijes, që shpesh lidhen me testime të ndryshme si PISA dhe me konceptin e dijes universale që nuk njeh kufij, kërkojnë të rinj që dinë të manifestojnë atë që dinë dhe ta funksionalizojnë në çdo rrethanë dhe kontekst, jo duke e lokalizuar në kuptime të ngushta apo provinciale.

Çdo shoqëri që nuk hyn në interaksion me botën e jashtme, me module të mobilitetit dhe shkëmbimeve akademike, mbetet në këneta e improvizimeve. Për ndryshime të vërteta nuk mjafton politika dhe as reformimi i ligjeve. Nevojitet një energji rinore disidente, e përbërë nga individë me ëndrra të vërteta, që duan të sfidojnë status quo-në përmes dijes, kurajos dhe veprimit.

Teksti është zhvilluar në kuadër të projektit “Përfaqësim për zhvillim gjithëpërfshirës”, i mbështetur financiarisht nga Qeveria e Zvicrës përmes programit Civica Mobilitas.

Përmbajtja e këtij teksti është përgjegjësi e vetme e Forumit për Politika të Arsyeshme, IOHN dhe BIRC dhe në asnjë mënyrë nuk mund të konsiderohet se pasqyron pikëpamjet e Qeverisë së Zvicrës, Civica Mobilitas ose organizatave të saj zbatuese.