SEKTORI CIVIL KA KAPACITET TË KONTRIBUOJË PËR LIGJE MË CILËSORE
Bashkëpunimi i rregullt dhe intensiv, procedura më të thjeshta për iniciativat qytetare, lista të azhurnuara për komunikim me organizatat qytetare, informim më i madh dhe takime më të shpeshta të rregullta me organizatat qytetare ishin përfundimet kryesore nga Forumi i sotëm kombëtar i Civika mobilitas “Bashkëpunimi mes Parlamentit dhe organizatave qytetare”.
Mbi 120 deputetë dhe përfaqësues të organizatave qytetare morën pjesë gjatë diskutimit ku u reflektuan përvojat e deritanishme nga bashkëpunimi, ndërsa u vendosën edhe perspektivat e ardhshme.
Kryetari i Parlamentit, Talat Xhaferi, e hapi evenimentin duke e theksuar avancimin e Parlamentit për të qenë të hapur drejt qytetarëve dhe shoqatave. “Parlamenti, me këtë mandat, tregoi se është i hapur për çdo iniciativë e cila vjen nga sektori civil. Ndoshta kemi nevojë për kanalizim sa më efikas të këtyre propozimeve dhe iniciativave, si dhe zbatimin e tyre”, shtoi ai.
Ambasadorja e Zvicrës, ekselenca e saj Sibil Suter Tejada¸ e përshëndeti zhvillimin që në të kaluarën e ka bërë shoqëria civile dhe u bë aktor i rëndësishëm dhe partner kryesor në reformat qeveritare. “Shpresoj se ky trend pozitiv do të përcillet edhe me masa tjera siç është mbështetja financiare e shoqërisë civile dhe ndarja transparente e fondeve”, tha ajo.
Jovan Mitrevski dhe Nikolla Micevski, koordinatorë të grupit të deputetëve të LSDM dhe VMRO-DPMNE, e shprehën perspektivën e tyre të bashkëpunimit dhe pritjet se organizatat qytetare do të jenë edhe më shumë të inkuadruara në reformat të cilat do të vijojnë, si pjesë e procesit të aderimit drejt BE-së. Ata u pajtuan se mekanizmat për bashkëpunim nuk janë shfrytëzuar tërësisht, ndërsa po përgatiten ndryshimet të cilat do të hapin hapësirë më të madhe për pjesëmarrje.
Deputetet Sllagjana Mitevska, Ivana Tufegxhiq, Julijana Nikollova dhe Shpresa Hadri i theksuan shembujt e bashkëpunimit me organizatat qytetare. Mes tyre si më të theksuara u përmendën ratifikimi i Konventës së Stambollit, Ligji për ndërprerjen e shtatzënisë, Ligji për pengimin dhe mbrojtjen nga diskriminimi, Ligji për pengimin e korrupsionit dhe konfliktin e interesave, si dhe procedura për zgjedhje të anëtarëve të ri të KSHPK. Për ata, me rëndësi të veçantë janë trajnimet, punëtoritë, vizitat studimore dhe evenimentet e ngjashme të cilat u ndihmojnë të njoftohen më mirë me problemet e qytetarëve dhe të veprojnë në mënyrë adekuate.
Vlora Reçica nga IDSCS, Irena Cvetkoviq nga Koalicioni “Margjinat” dhe Sreten Kocevski nga IRZ Tetovë, e prezantuan luftën e sektorit civil që të dëgjohen nga ana e pushtetit ligjdhënës. Ata i ndanë përvojat e tyre gjatë përpilimit të Dokumentit Bluprint për reformat urgjente, Ligji për vetëqeverisjen lokale dhe për themelimin e grupit ndërpartiak parlamentar për LGBTI. Krahas sukseseve, u përmendën edhe pengesat të cilat dalin para shoqatave dhe e vështirësojnë bashkëpunimin dhe komunikimin me këtë institucion.
Gjatë diskutimit, pikërisht komunikimi ishte theksuar si pikë kyçe për avancim dhe u kërkua që i njëjti të institucionalizohet. Përveç kësaj, u vërtetua se ka nevojë për vendosjen e praktikës së rregullt për inkuadrimin e shoqatave në punën e komisioneve parlamentare.
Takimi i këtillë u dëshmua si format i mirë për ballafaqim dhe diskutim mes dy palëve, pas çka Xhaferi porositi se mund të shndërrohet në praktikë të rregullt dhe të organizohet së paku një herë në vjet.
