Filloi zbatimi i “Ishujve të Integritetit”

Për përfaqësuesit e 12 organizatave civile, përfitues të granteve të Civika mobilitas, filluan punëtoritë e quajtura “Ishujt e Integritetit” të cilat synojnë të forcojnë ndjenjën personale të integritetit dhe të rezultojnë në ndryshime sistemike dhe organizative që do të rrisin rezistencën ndaj korrupsionit.

Dy punëtoritë e para, nga cikli prej katër punëtorish, u mbajtën në shtator. Më 4 shtator, gjatë punëtorisë së parë, pjesëmarrësit mësuan më shumë për konceptet e integritetit dhe korrupsionit. Ata bënë një vlerësim të vlerave të integritetit personal, dhe më pas të kulturës së integritetit organizativ. Kjo ishte gjithashtu pjesë e detyrave të tyre ndërmjet seancave, për të ndarë pyetësorin me kolegët dhe aktorët e tjerë që njohin punën e organizatës, për të përmbledhur të dhënat dhe për të përgatitur një raport për këtë. Sa i përket korrupsionit, u ndanë informacione statistikore për gjendjen në vend, ndërsa diskutimi u fokusua në aktivitetet e mundshme për t’u përballur me të. Trajnerët i prezantuan me metodologjinë e “Ishujve të Integritetit” dhe formulën e korrupsionit të profesorit Robert Klitgaard.

Punëtoria e dytë iu kushtua diagnozës së përgjithshme dhe të thellë të integritetit dhe cenueshmërisë ndaj korrupsionit të organizatave. Përmes katër pyetësorëve, pjesëmarrësit bënë një vlerësim të niveleve të monopolit, diskrecionit dhe transparencës e llogaridhënies në gjithsej katër fusha: menaxhimi i financave dhe aseteve, menaxhimi i burimeve njerëzore, zbatimi i projekteve dhe ofrimi i shërbimeve, si dhe qeverisja dhe partneritetet. Falë kësaj diagnoze, ata identifikuan rreziqet e mundshme të korrupsionit dhe më pas, në diagnozën e thellë, analizuan aktivitetet që janë të cenueshme ndaj korrupsionit. Në ditët e ardhshme, deri në punëtorinë e tretë, pjesëmarrësit do të ndajnë pyetësorët me kolegët e tyre dhe aktorët e tjerë të lidhur me organizatën për të marrë një perceptim më të gjerë për këto çështje.

Punëtoritë ishin të pasura me diskutime, dhe pjesëmarrësit i vlerësuan ato si të dobishme dhe frymëzuese. Në këtë fazë të zbatimit të “Ishujve të Integritetit” janë të përfshira organizatat Hera, Pro Lokal, Qendra për Burime Mjedisore, Qendra për Ndryshime Klimatike, Qendra për Iniciativa Qytetare, Forumi Rinor Arsimor, Forumi për Politika të Arsyeshme, Glasen Tekstilec, Promo Idea Strumica, CMA-Krik, Koalicioni Rural dhe InSok Tetovë.

Civika mobilitas po shqyrton mundësinë për një cikël tjetër trajnimesh në të cilin do të përfshihen organizatat e interesuara që nuk janë pjesë e këtij cikli.