Të rinjtë dhe angazhimi i tyre ishin tema kryesore e diskutimeve gjatë vizitave të kolegëve nga NIRAS

Një pjesë e ekipit të Civica Mobilitas shoqëroi kolegët nga organizata partnere NIRAS nga Danimarka gjatë vizitës së tyre në organizatat qytetare që po zbatojnë projektin “Politika rinore sipas masës së të rinjve”, e cila u mbajt nga 10 deri më 12 korrik të këtij viti. Ata patën mundësinë të bisedojnë me përfaqësuesit e organizatës udhëheqëse Pro Lokal dhe të Qendrës për të Rinj Pelagonci “Ethnos”, Këshillin Rinor Prilep dhe Empowering – Krushevë. Të rinjtë, angazhimi i tyre, nevojat dhe mundësitë ishin fokusi i bisedimeve me të katër organizatat.

Kolegët nga Qendra për të Rinj Pelagonci “Ethnos” u përqendruan te çështjet e mbrojtjes nga zjarri dhe shërbimet shëndetësore në rajon. Ata theksuan se banorët lokalë kanë vështirësi në marrjen e shërbimeve shëndetësore dhe se mungojnë automjetet ambulatore dhe ato për zjarrfikës. “Debreshte dhe zonat përreth kanë nevojë për masa dhe strategji efektive për parandalimin e zjarreve, veçanërisht gjatë muajve të verës kur rreziku i zjarreve është më i madh”, theksuan ata. Me projektin e mbështetur nga Qeveria e Zvicrës, përmes Civica Mobilitas, mbështeten aktivitete për rritjen e ndërgjegjësimit te të rinjtë për rëndësinë e parandalimit të zjarreve dhe për përmirësimin e shërbimeve shëndetësore në komunitet. Egeis Mustafa, kryetari i “Ethnos”, theksoi nevojën për më shumë angazhim të të rinjve jo vetëm për këto çështje, por edhe për të gjitha çështjet e tjera.

Gjatë takimit me përfaqësuesit e Pro Lokal, u diskutuan problemet me transportin publik në rajon. Të rinjtë nga komunat e largëta nuk kanë si të arrijnë në Bitola apo të kthehen në shtëpi pas orës 19:00, sepse atëherë ndalojnë autobusët e qytetit. Ata theksuan rëndësinë e pjesëmarrjes aktive të të rinjve në debatet publike dhe iniciativat për ndryshime në legjislacionin që ka të bëjë me të drejtat dhe nevojat e tyre. “Fuqia rinore është çelësi për bizneset lokale dhe zhvillimin ekonomik të komunave më të vogla, sepse pa pjesëmarrjen aktive të të rinjve, mbijetesa dhe zhvillimi i bizneseve lokale mund të jenë të kufizuara ndjeshëm”, thanë pjesëmarrësit në diskutim.

Për Këshillin Rinor Prilep, prioriteti kryesor janë politikat rinore. Përfaqësuesit e kësaj organizate po punojnë për të përfshirë më shumë të rinj në aktivitete për të mbështetur komunat, duke kontribuar në zhvillimin e politikave lokale.

Mbrojtja e mjedisit është në fokus të Empowering Krushevë. Ata informuan se gjatë muajit korrik do të organizojnë dy grupe fokusi, ku do të diskutojnë me palët e interesuara dhe do t’i përfshijnë ato në diskutimet për të ardhmen e Krushevës. Qëllimi i tyre është përmirësimi i selektimit të mbetjeve dhe gjetja e mënyrave për të parandaluar krijimin e deponive që shpesh shkaktojnë zjarre gjatë muajve të verës. Ata kërkuan nga autoritetet lokale dhe kryetari i komunës t’u japin një hapësirë të re për qendrën rinore. Me qasjen ambicioze dhe përkushtimin për mbrojtjen e natyrës, anëtarët jo vetëm që promovojnë vlerat ekologjike, por edhe tregojnë rëndësinë e aktivizmit qytetar dhe ndikimin e tij. “Misioni ynë nuk është vetëm ruajtja e natyrës, por edhe krijimi i një komuniteti që kujdeset për të”, tha Zorica Kuzmanoska, kryetare e shoqatës dhe profesoreshë në shkollën e mesme në Krushevë.

Përfaqësuesit e NIRAS-it patën mundësinë të krijojnë një përshtypje dhe të informohen më mirë për ecurinë e projektit, për angazhimet e përfituesve të granteve dhe për sfidat me të cilat ata përballen.