Kërkohet fokus më i madh në raportimin e arritjeve të organizatave civile

Komunikimet e Civika Mobilitas dhe organizatat civile në përgjithësi ishin temë e punëtorisë që u mbajt më 16 maj 2024 në Shkup.

Në total, 37 përfaqësues të 32 organizatave civile diskutuan mbi sfidat e komunikimit në kohën që jetojmë. Fluksi i madh i informacionit drejt qytetarëve, fjalimi i urrejtjes dhe lajmet e rreme e ngarkojnë procesin e informimit të organizatave civile ndaj grupeve të tyre të targetuara dhe ndaj publikut.

Pjesëmarrësit u pajtuan se një nga përshtatjet më të rëndësishme që duhet të bëhet është të fokusohet në raportimin e arritjeve, në vend të informacionit për aktivitetet. Sigurisht, këto të fundit nuk duhet të përjashtohen, por është thelbësore që organizatat civile të raportojnë për ndryshimet që ndodhin falë angazhimit të tyre.

Disa nga të pranishmit ndanë përvojat e tyre në komunikimin me mediat, duke theksuar se si dhe pse duhet shfrytëzuar hapësira që mund të ndihmojë në avokimin e tyre të mëtejshëm dhe ndikimin mbi politikat. Pjesëmarrësit gjithashtu u përqendruan në fjalimin e urrejtjes, veçanërisht në rrjetet sociale, dhe diskutuan se si i trajtojnë komentet e tilla.

Ekipi i Civika Mobilitas prezantoi kanalet e komunikimit që disponojnë, i ofroi ato si plotësim të kanaleve të tyre dhe i inkurajoi që të ndajnë informacione mes tyre, të përdorin hashtag-e dhe përmendje (mentions) për të pasur një arritje më të madhe. Përveç kësaj, duke folur për statistikat e vizitave, u rekomandua pjesëmarrësve që të përpiqen të kuptojnë më mirë zakonet e komunikimit të grupeve të targetuara dhe të përshtaten me to. Edhe pse publikimi në rrjetet sociale është më i lehtë dhe më i shpejtë, nuk duhet injoruar publikimi në faqet e internetit.

Pjesëmarrësit u dakorduan që do ta intensifikojnë komunikimin e ndërsjellë, ndërsa ekipi i Civika Mobilitas do të vazhdojë t’i mbështesë dhe lehtësojë këtë proces.