SHGM paraqiti ankesë në Odën e Avokatëve për shkak të frikësimit juridik ndaj portalit Skopje1.mk

Shoqata e Gazetarëve të Maqedonisë (SHGM) ka paraqitur ankesë në Odën e Avokatëve të Republikës së Maqedonisë së Veriut për shkak të një shkrese të dërguar nga një avokat nga Shkupi drejtuar redaksisë së portalit Skopje1.mk, për të cilën SHGM vlerëson se paraqet formë presioni dhe frikësimi juridik me qëllim heshtjen e gazetarisë hulumtuese.

Sipas pretendimeve në ankesë, shkresa është dërguar si “reagim” dhe “demant”, por është formuluar në mënyrë që nuk i plotëson kushtet për një procedurë të rregulluar ligjërisht për korrigjim. Në të, siç theksohet, nuk përmenden qartë personat në emër të të cilëve pretendohet se veprohet, nuk specifikohet saktë se çfarë konkretisht duhet të demantohet dhe përdoret një ton kërcënues në vend të komunikimit juridik të argumentuar.

SHGM thekson se në shkresë bëhen kërcënime të pabazuara për përgjegjësi penale ndaj redaksisë, përfshirë kualifikime për gjoja “zbulim të sekretit zyrtar”, si dhe paralajmërime për ndjekje penale dhe “cenim të reputacionit” të “klientëve” të paidentifikuar. Ky qasje, sipas SHGM-së, përbën keqpërdorim të mjeteve juridike për frikësimin e një mediumi dhe krijimin e presionit mbi politikën redaktuese.

SHGM paralajmëron se shkresa të tilla kanë pasoja serioze mbi lirinë e shprehjes dhe të drejtën e publikut për t’u informuar. Në vend që të korrigjohen eventualet pasaktësi përmes mekanizmave të paraparë, krijohet një “efekt ftohës” – gazetarët dhe redaksitë vihen në pozitë të vetëcensurohen, të vonojnë ose të heqin dorë nga hulumtimet mbi tema me interes të lartë publik, veçanërisht kur bëhet fjalë për punën e institucioneve të drejtësisë. Për më tepër, harxhohen kohë dhe burime të redaksive për përgjigje dhe mbrojtje juridike, në vend të punës gazetareske, gjë që dobëson drejtpërdrejt mbikëqyrjen publike dhe debatin demokratik.

SHGM kërkon që organet kompetente të Odës së Avokatëve të nisin procedurë disiplinore dhe të reagojnë në mënyrë përkatëse, me qëllim që të dërgohet një mesazh i qartë se profesioni i avokatit nuk guxon të përdoret si instrument presioni ndaj mediave. SHGM mbetet e përkushtuar në mbrojtjen e gazetarëve dhe lirive mediatike dhe do të vazhdojë të reagojë në të gjitha rastet e frikësimit juridik të drejtuar ndaj heshtjes së interesit publik.

Ky lajm u publikua fillimisht në faqen e Shoqata e gazetarëve të Maqedonisë (SHGM)