Qytetarët për ndryshim #19

TETOR-DHJETOR 2024

Mirë se vini në numrin e ri të Qytetarëve për Ndryshim #19, me fokus në Angazhimin Qytetar.

“Jam i bindur se në dialog me organizatat joqeveritare do të mund të ndërtojmë politika më të mira, do të mund të marrim vendime më cilësore për sfera të caktuara të shoqërisë.” Ky ishte një nga mesazhet që kryeministri Mickovski ua dërgoi përfaqësuesve të organizatave të shoqërisë civile në Forumin kombëtar të Civika mobilitas që u zhvillua më 15 nëntor 2024.

Gatishmëria e kryeministrit për të bashkëpunuar me organizatat e shoqërisë civile u mbështet edhe me pjesëmarrjen e pesë ministrave të tjerë nga Qeveria si dhe Sekretarit gjeneral Janushev. Gatishmëria e organizatave të shoqërisë civile u mbështet me pjesëmarrjen e rreth 200 përfaqësuesve.

Nevoja për bashkëpunim ndërmjet pushtetit kombëtar dhe organizatave të shoqërisë civile nuk ka nevojë të shprehet në mënyrë specifike. Ajo nuk është vetëm në interes të Qeverisë dhe organizatave të shoqërisë civile, por është edhe më e rëndësishme për shfrytëzuesit e tyre përfundimtar, për qytetarët. Disa nga përfaqësuesit e qeverisë, në fjalimet e tyre, demonstruan konsultime me organizatat e shoqërisë civile në proceset e ndryshimit apo miratimit të politikave. “Nuk do të krijojmë një strategji të rastësishme që nuk i përfshin organizatat joqeveritare”, tha ministrja e Arsimit dhe Shkencës Vesna Janeva, duke iu përgjigjur pyetjes rreth konsultimeve lidhur me strategjinë kombëtare të arsimit që do të miratohet në vitin 2026. Ajo tha se Ministria e Arsimit dhe Shkencës tashmë ka përfshirë 40 organizata të shoqërisë civile në konsultime për miratimin apo ndryshimin e gjashtë ligjeve që kanë të bëjnë me arsimin.

Ishte interesante të dëgjohet se disa nga ministrat na perceptojnë, neve nga organizatat e shoqërisë civile, si kritikë, jo si kritikues. “Një kritik i mirë jep kritika konstruktive që sjell zgjidhje”, thotë ministri i transformimit digjital Stefan Andonovski. Pritshmëritë e tij nga organizatat e shoqërisë civile nuk janë vetëm në ofrimin e zgjidhjeve për përmirësimin e politikave, por edhe më shumë në shfrytëzimin e ekspertizës që sipas tij “duhet të vijë natyrshëm nga sektori i shoqërisë civile”. Ky kontribut i organizatave të shoqërisë civile, sipas tij, është i një rëndësie të paçmuar dhe është një lidhje mes qytetarëve dhe institucioneve.

Gatishmëri dhe hapje për bashkëpunim kanë treguar edhe përfaqësues të tjerë të qeverisë. Me organizimin e këtij forumi, në bashkëpunim me Qeverinë, Civica mobilitas ndihmoi për të rinovuar ose vendosur kontakte të ndërsjella dhe për të dakorduar takime vijuese.

Shpresojmë që kjo gatishmëri të mos mbetet vetëm një deklaratë, të paktën ne nga sektori do të bëjmë çmos që t’i “mbajmë për fjalë” ministrat, sekretarin e përgjithshëm dhe kryeministrin. Kjo do të na lejojë të gjithëve të flasim për rezultatet në takimin e ardhshëm, jo vetëm për planet.