Problemi me deponitë është i thellë dhe nevojitet zgjidhje afatgjate
“Deponitë – ku dhe kur”, ishte tema e forumit regjional i cili u mbajt sot në Tetovë, në të cilin morën pjesë kryetarë të komunave dhe përfaqësues të organizatave qytetare, si dhe përfaqësues të institucioneve shtetërore. Forumi ishte organizuar nga ana e programit Civika mobilitas.
Gjatë Forumit u zhvillua debat i gjerë për problemin e madh me menaxhimin me mbeturinat, seleksionimin dhe përpunimin e tij, numrin e madh të deponive të egra, si dhe për nevojën nga deponitë regjionale, me të cilat ballafaqohen qytetarët nga Rajoni planor i Pollogut dhe Jugperëndimor i Maqedonisë.
Sipas përfaqësuesve të komunave, ata individualisht nuk mund të bëjnë shumë për zgjidhjen afatgjate të problemit me deponitë. Teuta Arifi, kryetar e Komunës së Tetovës, deklaroi se është biseduar me Qeverinë që të ndërmarre kompetenca më të mëdha për zgjidhjen e këtij problemi, sepse komunat individualisht nuk mund të bëjnë shumë në këtë plan. “Problemi me mbeturinat në Maqedoni mund të zgjidhet me hapjen e tre deponive, të cilat do të shërbejnë për gjithë vendin”, tha ajo. Përndryshe, sipas Arifit, numri i madh i deponive do ta “imtësojnë” sasinë e mbeturinave, që është kryesore për arsyetimin e investimit të cilësdo kompani.
Edhe kryetari i Komunës së Jegunovcit, Darko Bllazhevski, e ndau këtë qëndrim se asnjë komunë nuk mundet vetë të ballafaqohet me mbeturinat. “Nevojitet bashkëpunim regjional dhe angazhim i pushtetit qendror”, tha ai.
“Zgjidhja regjionale për menaxhimin me mbeturinat është më e mira, më ekonomikja”, u ndërlidh Ana Karanfillova nga Ministria e Ambientit Jetësor. Qëndrimi i saj është se Qeveria mund të ndihmojë në gjetjen e zgjidhjes, si dhe të mjeteve, por menaxhimi me mbeturinat është obligim i komunave. Megjithatë, sipas Karanfillova, shpenzimet për menaxhimin me mbeturinat duhet t’i kenë qytetarët.
Fatmir Saiti tha se Qendra për zhvillimin e rajonit planor të Pollogut, drejtor i të cilës është ai, e ka formuar këshillin regjional për këtë çështje, si dhe grupin teknik i cili e ndihmon ringjalljen dhe funksionimin e këtij këshilli. Arianit Xhaferi nga Eko Guerila theksoi se politikanët nuk bëjnë mjaft për zgjidhjen e problemit me deponitë. “Mendoj se përveç që është e nevojshme t’i edukojmë qytetarët, duhet t’i edukojmë edhe politikanët”.
Në këtë forum mori pjesë edhe Filip Ivanovski nga Pakomak. “Shpresoj se do të ekzistojë edhe vullnet politik për zgjidhjen e problemit. Nuk janë gjithnjë të hollat problem. Kur ka vullnet politik gjenden edhe mjetet. Vullneti politik i kryetarit të komunës është vendimtar”, tha ai. Ivanovski theksoi se sjellja e pandërgjegjshme me mbeturinat u kthehet qytetarëve në tryezë, përmes ushqimit të tyre.
Pas ekspozesë të pjesëmarrësve, u zhvillua debat rreth asaj se sa politikanët punojnë rreth këtij rasti, si dhe për zgjidhjet konkrete të problemit me menaxhimin me mbeturinat.
