Ambasadori i ri zviceran e konfirmon angazhimin ndaj shoqërisë civile
Ekipi i Civika mobilitas më 16 tetor e pati takimin e parë me Ambasadorin e sapoemëruar të Zvicrës në Maqedoninë e Veriut, Sh.T. Kristof Zomer. “Unë besoj se shoqëria civile është një fushë shumë e rëndësishme në të cilën duhet të përqendrohemi”, theksoi Ambasadori, duke konfirmuar se mbështetja e organizatave të shoqërisë civile është një nga prioritetet e Zvicrës.
Aleksandar Krzhallovski , udhëheqësi i ekipit të programit dhe drejtor i Qendrës Maqedonase për Bashkëpunim Ndërkombëtar (MCMS), në fjalimin e tij bëri një hyrje të shkurtër rreth QMBN-së, organizatës që e zbaton programin dhe një nga organizatat më të mëdha të shoqërisë civile në vend.
Duke folur për Civika mobilitas, programi më i madh i mbështetjes së shoqërisë civile në vend, i mbështetur nga Qeveria Zvicerane për gati 20 vjet, ai e njoftoi ambasadorin Zomer me arritjet e tre fazave të zbatimit në të cilat është e përfshirë QMBN.
Krzhallovski u përqendrua në procesin e kapitalizimit, i cili do të përfshijë gjithçka që është arritur në këto pothuajse 20 vjet. Përveç kësaj, kapitalizimi do të ofrojë një fushëveprim më të gjerë të rezultateve të Civica mobilitas, duke iu referuar kontekstit në të cilin u kryen aktivitetet, përputhshmërisë së tyre me zhvillimet e rëndësishme në vend dhe qëllimet e tij strategjike, siç është procesi i integrimit evropian. Ambasadorit Zomer iu prezantua versioni fillestar i afatit kohor të kapitalizimit të Civica mobilitas të krijuar si një vegël digjitale që do të ndihmojë në lundrimin nëpër arritjet ndër vite.
Duke pasur parasysh që Civika mobilitas synon kryesisht mbështetjen financiare për organizatat e shoqërisë civile, Ambasadorit iu prezantua edhe një vegël tjetër digjitale, pra një panel kontrolli (dashboard) ku mund të shihen të gjitha organizatat e mbështetura, llojet e granteve, sektorët në të cilët kanë punuar, rajonet ku janë zhvilluar aktivitetet, etj. Lidhur me grantet, u prezantua edhe platforma grants.mk përmes së cilës zhvillohet procesi i aplikimit.
Financimi shtetëror ishte një nga temat më të diskutuara, jo vetëm në aspektin e mbështetjes financiare, por edhe nga aspekti i krijimit të një sistemi transparent për mbështetjen e organizatave të shoqërisë civile që do të mundësojë ndërtimin e një marrëdhënie besimi midis organizatave dhe institucioneve në nivel qendror dhe lokal.
Duke folur për sfidat me të cilat përballen organizatat e shoqërisë civile në punën e tyre, Ambasadori theksoi se ato duhet të jenë elastike dhe të mësojnë të funksionojnë në të gjitha kushtet.
Ekipi i Civika mobilitas shprehu mirënjohje për mbështetjen e Zvicrës për organizatat e shoqërisë civile deri më tani dhe i uroi ambasadorit të ri punë të suksesshme.
