ЗДРУЖЕНИЕ ЖЕНСКИ ФОРУМ ТЕТОВО (ЖФ)
Објавено: 16/10/2015
Вкупен буџет: 1.799.800
Времетраење: 01.7.2016 – 30.4.2018
Женски Форум-Тетово (ЖФ) е здружение, основано во јануари 2001 во Тетово, како Форум на албанска жена за поддршка на жените од руралните средини за еманципација и вклучување во општествените текови. Од 2008 година, организацијата е преименувана во Здружение Женски форум – Тетово. Седиштето е во Тетово, но активностите се реализираат во регионот на северниот и западниот дел на РМ.
ВИЗИЈА: Женски форум – Тетово се стреми кон еманципацијата на жената, особено од руралните средини; самоосвестување на жената и подигнување на свеста за нејзиниот нерамноправен статус во општеството; заштита на човековите права и еднаквост меѓу половите.
МИСИЈА: Женски форум – Тетово е невладина организација која работи во северниот и западниот дел на Македонија на подигање на свеста на жената за нејзино осамостојување, јакнење на нејзината самодоверба и непречена интеграција во општествените текови. ГЛАВНА ЦЕЛ: Промовирање на жената како рамноправен партнер во донесувањето одлуки и придонесување кон зајакнување на жената во заземањето значајни улоги во развојот на цивилното општество во Македонија.
СТРАТЕШКИ ЦЕЛИ И ПРОГРАМИ за 2013-2016 година се: 1) Институционален развој 2) Економски развој и јакнење на жената 3) Заштита и унапредување на човековите права.
Конституенти
Жени со искуство и експертиза од областите на делување кои добро го познаваат теренот, блиски се и соодветно одговараат на интересите и потребите на корисниците (кои се жртви на семејно насилство, потенцијални жртви на трговија со луѓе, жени на кои им е потребно финансиско осамостојување, ромски и маргинализирани деца и семејства). ЖФ брои 39 членови и 13 волонтери. Конституентите се на различна возраст и образовни профили. Има соработка со Општина Тетово, ЦСР, СВР, Биро за развој на образование, медиуми и други кои ги смета за свои поддржувачи. Соработува со други ГО и членува во национални мрежи.
Претходно искуство
- Граѓанска акција за родова еднаквост
- Со економско зајакнување кон родова еднаквост
- Зголемување на пристапот до Ран детски развој за ромски и маргинализирани деца и семејства.
За проектот поддржан од Цивика мобилитас
Економско зајакнување на жените во Полошкиот регион преку застапување и промовирање на нивните имотни права
За што е потребна акцијата
Основната димензија на нееднаквоста и потчинетоста на жената во Република Македонија и конкретно во Полошкиот регион е нејзината економска нееднаквост. Ова е особено изразено во областа на имотните и наследните права. Додека жената е формално правно изедначена со мажот во сопственоста и наследувањето, патријархалната традиција во голема мера ја исклучува жената од пристап до имотни права (поделба на имот, добивање на наследство). Во најголема мера мажите се привилегирани како сопственици и наследници, додека жените често немаат никаква сопственост. Тоа ја зацврстува нивната положба на потчинетост и зависност од мажот и е основна димензија на родова дискриминација во Република Македонија. Оваа дискриминација често се спроведува со волна или неволна согласност на самата дискриминирана страна. Феноменот машките деца да го добиваат целиот имот, а женските да не добиваат ништо е посебно изразен во руралните средини. Во Полошкиот регион жените во најголема мера не можат да ги остварат своите законски имотни и наследни права.
Цели и резултати
Општа цел – Придонес кон економско зајакнување на жените во Полошкиот регион.
Специфична цел – Поттикнување и придонес кон остварувањето на имотните (и наследните) права на жените во Полошкиот регион.
Резултати
- Свеста на жените (и на целокупната јавност) од Полошкиот регион за нивните имотни (и наследни) права е подигната преку дебати, советувања, и јавна кампања
- Остварувањето на имотните (и наследните) права на жените во Полошкиот регион е подобрено преку служба за правна помош
- Мрежа на релевантни чинители (ГО, ЛС, правни експерти, медиуми. итн.) е формирана и активирана на полето на промовирање на имотните права на жените во Полошкиот регион.
Активности
- Спроведување, објавување, и промовирање на истражување за состојбата со имотните и наследните права на жените во Полошкиот регион.
- Организирање на најмалку 6 јавни дебати со релевантни чинители (ГО, медиуми, ЛС, правосудни органи, итн.) за имотните права на жените.
- Организирање на најмалку 20 локални советувања (со акцент на рурални средини) за конституенти (жени) за нивните имотни права.
- Организирање на јавна кампања (постери, летоци, и други промотивни материјали)
- Воспоставување на служба за правна помош за имотни и наследни права на жените.
- Обезбедување на бесплатна правна помош (советување).
- Организирање на најмалку 30 индивидуални и групни состаноци со релевантни чинители (ГО кои работат во родова еднаквост, човекови права, медиуми. ЛС, итн.) за придобивање на нивна поддршка за промовирање на економските права на жените.
- Координирање на релевантните чинители во мрежа.
- Организирање на најмалку четири координативни состаноци на мрежата за цел разгледување на состојбите и предлагање на конкретни мерки.